مقدر انسي البشر
موجود على الأرض دم كتير وله أصحاب
ماشيين على الأرض لسه مانتهوش لتراب
قاعدين على البرش لسه من ورا الأبواب
لاهثين ورا القرش لسه وبيطولوه بعذاب
عايشين على الشمس والطين هما والأعشاب
عاملين لترس المكينة سيور من الأعصاب
حارقين فى فرن القمينة عضمهم أخشاب
رايحين وجايين غلابا مظلومين أغراب
موجود على الأرض دمع كتير وله أسباب
فى عيون مرات الشريد اللي شبكها وغاب
وف قلبها اللي الشباب عجز فى قلبه وشاب
وف صحنها اللى صبح بعد الحكاية خراب
ودمع بنت الطريق صادق مهوش كداب
يبكي طريقها الطويلة وقلة الأحباب
يبكي خطاها الذليلة بين كلاب ودياب
يكتب على الأرض للعالم أَمَرّ حساب
والارض تشهد على دموع طفل نام ع الباب
ودمعة الطفل م الحرمان بتملا كتاب
كلام عن العدل بين الأبرياء وعتاب
موجود على الأرض موت وجروح وشوك وخراب
جنب الزهور والطيور والمنظر الجذاب
جنب الخدود والنهود وعواطف العزاب
موجود جنود مجرمين ناقصين قرون وانياب
مستعبدين أرضنا ومنجسين لاعتاب
مقدرش أنسى دا كله واتوه أنا في شعاب
مقدرش أنسى البشر متوزعين أسلاب
بين الحرامى دالاس وتشرشل النصاب
واوصف جمال الغروب والشمس نازفة سحاب
ملزوم احس بالم وانزف قصايد نار
الأحد يوليو 12, 2009 5:22 am
